من نیلیوم
قالماییب عالمده بیر آباد ویران اولماسین
یوخدی بیر ایو فرشی ،ظرفی،رختی تالان اولماسین
او نیجه گوزدر گوروب بو حالی گریان اولماسین
گوزلیه هر کیم پریشانی پریشان اولماسین
پس مسلماندا نچون انصاف و وجدان اولماسین
بو مروتدن اوزاقدر منده بیر نان اولماسین
بو عجب سوز سویلیری عقلنده نقصان اولماسین
ئول جانین چیخسون جانوندان بالدرک من نیلیوم
چوخ گورنمه،غره لنمه حالوا اولادوه
باغوه،بوستانوه ، اجدادوه ، احشاموه
هیچ بیری گلمز ئولنده دادوه ،فریادوه
گییدیر غسال کفن،چون قامت شمشادوه
آه او ساعتدن قارانلق قبر ایوین سال یادوه
بیر چراغ گوندرمدین اول خانه بر بادوه
آه او وقتدن یوکله نر سنگ لحد بنیادوه
گور کن قبرین قازار حسرت قویار آروادوه
مالوی وارث ییه روا حسرتا میعادوه
مالک دوزخ جهنمده گلر فریادوه
اعتقادین یوخ جهیمه ای آغ بیرچک من نیلیوم
بوینوی شاخ توتما ،شاتقیلداتما چوخ بارماقلارین
اللرین اولچمه ،ایتیتمه قورت کیمی دیرناقلارین
بوینونی بوکمش اجل چوخ سن کیمی سارساقلارین
شیشمه سین قولتوقلارین ،یلله نمه سین قورساقلارین
جانین عزرائیل چیخاردار،مرده شور باشماقلارین
ترک ایدر بیر گون سنی یاخدانداکی جیر ماقلارین
آخره یتدی زمانیکه یمک ایچماقلارین
پرده باغلار سوت،سحر عورت ییه ر قایماقلارین
اوینادار،شاققیلدادار،قیزلار قیزیل قولباقلارین
سن حسابین ویر،جانین چیخسین جفک من نیلیوم
آه او ساعتدن لوت ایلر مرده شور انداموی
تخته اوستوندا یوار ،تابوته زوللار جانوی
خلق ایچر ،چایین ،ییر پایین، چکر غلیانوی
قیرخ چخار ،وارث گلر تالان ایدر ویرانوی
هرنه وار پای پشک ایدر،حتی سنیق چایدانوی
بو همان مالدور که ساتدین دینوی ایمانوی
پایلاشار بیر گون بش اون عمامه لی احسانوی
ثلثوی یغما ایدر لر همچنین یخدانوی
هم آلار دورت آی سورا بیر بختور جانانوی
قیرلی فرلی بیر گوزل اوغلان مه تابانوی
کردی وار ایلر ، دوزه لدر باغوی بوستانوی
بو همان عورتدی اینجیتدین نقدری جانوی
اوندان اوتری خلقی سویدون چیگنه دین وجدانوی
ایندی یاد ایتمیر سنی ،ایلیر بزک من نیلیوم
