کندین قدیم رسم لری
چوللردن قیداخ کند آراسینا
قولاق آساق قوجالارون سسینه
باخاق اولارون شوقینه هوسینه
گور نه گوزل اولار دییب گولوللر
دییب گولما خلقین قدرین بولوللر
کاظمین پینه سی دوتسا بیرینه
بیرخام آدام تاپوپ سالسا گیرینه
یا دوشه سن مش اسماعیلین الینه
مثل دیوب محکوم ایدنلر سنی
یا که قویوب چوپ اویناداللرسنی
تویدا جوانلارین چپی چالماسی
میر مجیدین جالمانی دوندورماسی
یاکاظمین بند الوب گولدورماسی
گورمه لییدی چوخ لذتی وارییدی
غمدن اوزاقیدی دمه سارییدی
اشاره ایلیاخ بیر نچه بتده
بایرام رسمیده چوخ گوزلدی کتده
بایرامدا جوانلار چیخالا مرته
هره سی الینده رهلی یومورتا
سحرده ن اوینالا تا به گونورتا
کندین عجب سووملی قایداسی وار
دام باجادا توت ورومون سسی وار
دسته دسته اولوب ایولری گزر
محبت رونقی هر ایوی بزر
گوروشوب چای ایچیب تبریک ایدر لر
بیر آز دیوب گلوب دوروب گیدر لر
چرشنبه ده داملارا جیز چکرلر
اود یاندریب الاو اوستن کچرلر
اوشاقلار آتلیب دوشوب قاچالار
گوره سن اوشاقلارین عداسی ندور
اوینیوب گولماقین صفاسی ندور
اوشاقلار دولانیب بایراملوق ایستر
یومورتا شیرینی یا که پول ایستر
گیجه باجالاردان شال ساللیالار
ایوده کی لار مطلبی آنلیانلار
بایراملیقی دوگون نللر او شالا
گوزلدی بو قایدا گرک حفظ اولا
بیر آز قدیم تویدان صحبت ایلیاق
گوردوقوموز قدر سیزه سویلیاق
گلینین آتاسی بگین آتاسی
صحبت ایدوب رضایته چاتاسی
بش مانوت پول بیر کله قند بیر مولا
مبارکدی دییر دیلر انشالله
توی باشلاردی چالیبان اویناردیلار
سماورلر حیاتدا قیناردیلار
توی قوناقی گلردی دسته دسته
هره سی اگلشمیش کهلان آت اوسته
عاشیق کریمین گوزل ساز چالماسی
بیگ گلینه آلما ناری آتماسی
آواکین زرناسی عباسین سسی
ایشیده نه گتیراردی هوسی
قدیم تویون تماشاسی چوخیدی
اویناماقا چوخلارا وقت یوخیدی
حسین دونبک چیدور عینی بالابان
سیندریردی فاطمه نسا خالاجان
هامولیقجا داماقیمیز چاقیدی
چوخ آداملار اولمه میشدی ساقیدی
الله! ! کچن کیفیمیزی کیم آلدی
غم بیزی چولقادی کف کیمه قالدی
بوجور اولسا بو درد بیزی یخاجاق
غصه یماقدان جانیمیز چخاجاق
فیروز یازما سوز چکیری اوزونا
امید باقلا بیر آلاهین اوزونه
گلن گونلار انشالله خوش گله جاق
اورکلر آچلیب دوداق گوله جاق 